Druk artikel

Depressie
Wietske Boon

Eerstens is dit nodig om te onderskei tussen depressie en hartseer emosies.  Hartseer is kort-termyn emosies vir negatiewe of hartseer gebeure.  Depressie is langdurige emosies en denke van hartseer, hulpeloosheid en negatiwiteit teenoor hom/haarself en die omgewing sonder dat daar noodwendig ‘n rede voor is.

Depressie word veroorsaak deur ‘n wanbalans van die hormoon serotonien wat in die brein vrygestel word.  Hierdie kondisie is iets wat die kind nie kan beheer of verander nie.  Medikasie kan egter die wanbalans regstel sodat die kind se depressie verminder word.  Depressie word as ‘n probleem beskou wanneer dit normale funksionering belemmer byvoorbeeld die deelname aan daaglikse aktiwiteite.

'n Depressiewe kind kan ondersteun word deur die kind te motiveer om oor die emosies te praat of andersins om die emosies en denke uit te beeld deur middel van tekeninge of deur dit neer te skryf. Indien die kind se depressie nie verbeter nie of dit vererger sal dit raadsaam wees om 'n terapeut of sielkundige te gaan besoek. Moet nie die kind straf vir depressiewe emosies of denke nie aangesien die kind nie beheer oor die depressie het nie.

Deur die gebruik van medikasie of besoek aan ‘n terapeut of sielkundige kan die depressie verminder word sodat die kind normaal kan funksioneer.